اے خالقِ کُل اے مالکِ كُل

اے خالقِ کُل اے مالکِ كُل اے عالِمِ كُل اے قادرِ كُل
رَحمان ہے تو سبُحان ہے تو كوئى تيرى صفتيں پا نہ سكا

ہر شے پہ تصرُّف ہے تیرا جب حُكم كيا تب مِينہ برسا
اے مالک اَبر سے تيرے سوا اک بُوند بھی كوئى گرا نہ سكا

قادِر وہ نہيں جس سے كبھی بن سكتى نہيں اک مکھّی بھی
مكھی تو بنانا دور رہا اِک بال بھى بدلا جا نہ سكا

مَخلُوق ہے وہ مَجبُور ہے وہ مَحکُوم ہے وہ مختار نہیں
جو ضُعف و ضرَر سے سُقم و اجَل سے اپنى جاں بچا نہ سكا

تو جس كو ڈبونے پر آئے پھر كس ميں ہے قُدرت پار كرے
مجبُور رہا محبُوب ترا كشتى ميں پِسر كو بٹھا نہ سكا

ہر دل پہ تَصَرُّف ہے تیرا اِیمان ہے تیری ایک عطا
جس دل پر تيرى مہر لگی اسے كَلِمہ كوئى پڑھا نہ سكا

زندے ہیں وسیلہ زندوں کا ، زندے ہی تعاون کرتے ہیں
کوئی مُردہ نکل کے تُربت سے دُنیا کے کام بنا نہ سکا

مُردوں کو اٹھاتے ہیں زندے ، جا کر دفناتے ہیں زندے
جب رُوح بدَن کو چھوڑ گئی کوئی چل کے لَحَد کو جا نہ سکا

خاموشؔ کو رکھ اپنا ہی گدا ، کر صَبر و تَوَکُّل اس کو عطا
اِس دَر کے سوا دُنیا کو نبی ، دَر اور کسی کا بتا نہ سکا

 

اے خالقِ کُل اے مالکِ كُل اے عالِمِ كُل اے قادرِ كُل
رَحمان ہے تو سبُحان ہے تو كوئى تيرى صفتيں پا نہ سكا